Bugun.tv xəbər verir ki, ABŞ dolları sentyabr ayının son günündə əsas valyutalar qarşısında mövqeyini qoruyur və ayı artımla başa vurmağa hazırlaşır.
Reuters-in məlumatına görə, qlobal maliyyə bazarlarında sentyabr ayı istiqrazlar üçün çətin dövr olub. ABŞ-ın 10 illik dövlət istiqrazlarının gəlirliliyi 2007-ci ildən bəri ən yüksək səviyyələrdən birinə çatıb. Yaponiya istiqrazlarının gəlirliliyi də son illərin yüksək göstəricilərinə yaxınlaşıb.
Valyuta bazarında isə dolların sentyabr ərzində təxminən 2 faiz möhkəmləndiyi, avronun və funt sterlinqin isə gerilədiyi bildirilib. Reuters bunu əsasən inflyasiya ilə bağlı gözləntilər, yüksək enerji qiymətləri və dövlət borcları ilə bağlı narahatlıqlarla əlaqələndirir.
Bazar iştirakçıları eyni zamanda ABŞ Federal Ehtiyat Sisteminin gələcək faiz qərarlarını və enerji qiymətlərinin iqtisadi göstəricilərə təsirini izləyirlər.
Reuters qeyd edir ki, səhm bazarlarında istiqraz bazarındakı dalğalanmalara baxmayaraq nisbətən dayanıqlı mənzərə müşahidə olunub.
Mənbə: Reuters