ABŞ prezidenti Tramp İsrail və HƏMAS arasında əldə olunan razılaşmaya əsasən, girovların azad olunma tarixini açıqlayıb. Tramp həmçinin bildirib ki, bölgədəki varlı ölkələr Qəzzanın yenidən qurulmasını dəstəkləyəcək.
Qəzza zolağında davamlı sülhün əldə edilməsi istiqamətində diplomatik prosesdə kritik addım atılıb.
Misirdə keçirilən danışıqlarda İsrail hökuməti ilə HƏMAS arasında atəşkəslə bağlı razılıq əldə olunub.
İsrail və HƏMAS-ın Qəzza zolağında atəşkəs planının birinci mərhələsini təsdiqlədiyini elan etdikdən sonra ABŞ prezidenti Donald Tramp planın detalları ilə bağlı Fox News telekanalına danışıb.
Bütün dünyanın atəşkəs planını hazırlamaq üçün bir araya gəldiyini və bu plan olmasaydı, planın uğur qazana bilməyəcəyini qeyd edən Tramp, “Bu, Qəzzadan daha çox şeydir. Bu, Yaxın Şərqdə sülhdür” deyib.
Məhkumların azad edilməsinin “çox əhəmiyyətli” bir inkişaf olduğunu vurğulayan Tramp, “Məhkumlar yəqin ki, oktyabrın 13-də azad ediləcək” deyə bildirib.
İsrailin baş naziri Benyamin Netanyahunun bu yaxınlarda ona zəng edərək “inana bilmədiyini” dediyini bildirən Tramp, “Mən [Netanyahuya] İsrailin bütün dünya ilə döyüşə bilməyəcəyini söylədim. O, bunu çox yaxşı bilir” deyib.
“Sülh Şurası”
Atəşkəs planının gələcəyi ilə bağlı danışan Tramp, “Düşünürəm ki, insanların razılaşdığını və Qəzzanın yenidən qurulduğunu görəcəksiniz. Əsasən Qəzzaya müraciət etmək üçün “Sülh Şurası” adlı bir şura yaradılıb. İnsanlarla maraqlanacaq və bu, tamamilə fərqli bir dünya olacaq” deyib.
Tramp həmçinin Qəzzanın “daha təhlükəsiz” yer olacağını və digər ölkələrin də bu “yenidənqurma” prosesinə dəstək verəcəyini də qeyd edib.
Qəzzada atəşkəs planı
ABŞ prezidenti Donald Tramp İsrail və HƏMAS-ın Qəzzada atəşkəs planının birinci mərhələsini təsdiqlədiyini açıqlayıb.
Tramp bəyan edib ki, bu razılaşma bütün məhbusların azad edilməsi və İsrailin əvvəllər müəyyən edilmiş xətlərə çəkilməsi ilə nəticələnəcək.
Həmas da atəşkəs razılaşmasının əldə olunduğunu təsdiqləyib.
Mənbə: EnSonHaber