Bugun.tv xəbər verir ki, Avropada müşahidə olunan güclü istilər və uzunmüddətli quraqlıq nəticəsində Dunay çayında suyun səviyyəsinin kəskin azalması Bolqarıstanda qədim Roma dövrünə aid Konstantin körpüsünün qalıqlarını yenidən üzə çıxarıb.
Məlumata görə, Bolqarıstanın Gigen kəndi yaxınlığında görünən daş təməllər arxeoloqlara əsrlərdir su altında qalan tarixi tikilini yerində araşdırmaq imkanı yaradıb. Pleven Regional Tarix Muzeyinin mütəxəssisləri əraziyə ezam olunaraq dronlarla körpünün görünən hissələrinin xəritəsini hazırlayıb və onların vəziyyətini sənədləşdiriblər.
Tarixi mənbələrə əsasən, Roma imperatoru I Konstantinin göstərişi ilə inşa edilən və eramızın 328-ci ilində istifadəyə verilən körpü indiki Bolqarıstan ərazisində yerləşən Ulpia Oeskus şəhərini Rumıniyadakı Sucidava qalası ilə birləşdirirdi. Uzunluğu 2 kilometrdən çox olan tikili dövrünün ən möhtəşəm mühəndislik nümunələrindən biri hesab olunur. Körpünün təxminən eramızın 368-ci ilində dağıldığı ehtimal edilir.
Mütəxəssislər bildirirlər ki, suyun belə aşağı səviyyəyə enməsi nadir hallarda baş verir və bu cür hadisələr arxeoloji abidələrin öyrənilməsi üçün mühüm imkan yaratsa da, Avropada quraqlığın və iqlim dəyişikliklərinin təsirlərini də bir daha nümayiş etdirir.
Mənbə: EU Alive