ABŞ və İsrailin İrana qarşı 28 fevralda başladığı hücumların üzərindən bir ay keçərkən, dünyanın müxtəlif ölkələrində genişmiqyaslı etiraz aksiyaları keçirilir.
İranda paytaxt Tehran başda olmaqla bir çox şəhərlərdə hökumətə dəstək mitinqləri təşkil olunur. Xüsusilə Fələstin meydanında toplaşan izdiham ABŞ və İsrail əleyhinə şüarlar səsləndirir. Məşhəd, Təbriz, İsfahan və Qum kimi iri şəhərlərdə də oxşar aksiyalar müşahidə edilir. Məlumata görə, gözləntilərin əksinə olaraq ölkədə hökumət əleyhinə deyil, daha çox dəstək xarakterli çıxışlar üstünlük təşkil edir.
İsraildə isə fərqli mənzərə diqqət çəkir. Tel-Əvivdə yerləşən Habima meydanında minlərlə insan hökumətin müharibə siyasətinə qarşı etiraz aksiyası keçirib. Etirazçılar Baş nazir Benyamin Netanyahu və ABŞ siyasətini tənqid edərək, münaqişənin diplomatik yolla həllini tələb ediblər.
ABŞ-da da genişmiqyaslı etirazlar baş qaldırıb. “No Kings” şüarı ilə keçirilən aksiyalar ölkənin 50 ştatında təşkil olunub. Vaşinqton, Nyu-York, Los-Anceles və Çikaqo kimi iri şəhərlərdə milyonlarla insan küçələrə çıxaraq hökumətin xarici siyasətini sərt tənqid edib.
Müşahidəçilər qeyd edir ki, davam edən müharibə yalnız regionda deyil, qlobal miqyasda da ictimai narazılığı artırmaqda davam edir.
Mənbə: Ensonhaber