Bugun.tv xəbər verir ki, beynəlxalq alimlər qrupunun hazırladığı yeni hesabatda qlobal iqlim dəyişiklikləri ilə bağlı narahatedici nəticələr açıqlanıb.
Araşdırmaya görə, hazırkı istixana qazı emissiyaları tempi davam edərsə, qlobal istiləşməni Paris İqlim Sazişində nəzərdə tutulan 1,5°C həddində saxlamaq üçün qalan karbon büdcəsi cəmi üç ilə tükənə bilər. Alimlər bildirirlər ki, insan fəaliyyəti nəticəsində yaranan istiləşmə artıq sənaye inqilabından əvvəlki dövrlə müqayisədə 1,37°C-ə çatıb.
Hesabatda vurğulanır ki, atmosferə buraxılan karbon qazının həcmi azaldılmasa, 2030-cu illərin əvvəllərində 1,5°C həddinin aşılması ehtimalı çox yüksəkdir. Mütəxəssislər bunun daha güclü istilik dalğalarına, quraqlıqlara, meşə yanğınlarına və dəniz səviyyəsinin sürətlə yüksəlməsinə səbəb ola biləcəyini qeyd edirlər.
Tədqiqat müəllifləri hökumətləri və sənaye sektorunu emissiyaların azaldılması istiqamətində təxirəsalınmaz tədbirlər görməyə çağıraraq bildiriblər ki, qarşıdakı bir neçə il qlobal iqlim siyasəti üçün həlledici dövr olacaq.
Mənbə: Lemonde