Bugun.tv xəbər verir ki, Belçikanın Limburq bölgəsində yerləşən qeyri-adi velosiped yolu dünyada böyük maraq doğurur. “Suda velosiped sürmək” adlı layihə insanlara gölün tam ortasından keçərək pedal çevirmək imkanı yaradır.
Layihə çərçivəsində yaradılan xüsusi yol 200 metrdən artıq uzunluğa malikdir və gölün birbaşa içindən keçir. Beton divarlar sayəsində velosiped yolu su səviyyəsindən aşağıda yerləşdirilib. Bu isə insanlarda sanki suyun içində hərəkət edirmiş hissi yaradır.
2016-cı ildə istifadəyə verilən layihə yalnız turistik məkan kimi deyil, həm də ekoloji faydaları ilə diqqət çəkir. Layihə Bokrijk şəhəri, Visit Limburg turizm agentliyi və təbiəti mühafizə qurumlarının əməkdaşlığı ilə həyata keçirilib. Yeni sistem bölgədə su axınının yaxşılaşmasına və göl suyunun daha uzun müddət təmiz qalmasına kömək edib.
Velosiped yolu De Wijers göl mənzərəsi ərazisində yerləşir və Almaniya sərhədinə yaxın mövqedədir. Bölgəyə həm şəxsi avtomobil, həm də ictimai nəqliyyat vasitəsilə rahat şəkildə getmək mümkündür.
Mənbə: EnSonHaber