Son dövrlərdə Gen Z gəncləri arasında yayılan “early night” (erkən gecə) trendi sosial mediada geniş müzakirə olunur. Bu trend gecə saatlarını əyləncə və telefonla vaxt keçirmək əvəzinə, daha erkən yatmaq, özünə vaxt ayırmaq və istirahət etmək üzərində qurulub.
Trendə qoşulan gənclər bildirirlər ki, axşam saat 21:00-22:00 aralığında yatağa getmək, telefondan uzaq durmaq, kitab oxumaq, isti duş qəbul etmək və sakit musiqi dinləmək kimi vərdişlər onların həm fiziki, həm də psixoloji sağlamlığına müsbət təsir edir.
Mütəxəssislərin fikrincə, gec yatmaq və yuxusuzluq insan orqanizmində stres hormonlarını artırır, immun sistemini zəiflədir və depressiya riskini yüksəldə bilər. “Early night” isə yuxu rejimini qaydaya salaraq beyin fəaliyyətini yaxşılaşdırır, enerji səviyyəsini artırır və gün ərzində daha məhsuldar olmağa kömək edir.
Araşdırmalar göstərir ki, yuxu keyfiyyəti yüksəldikcə diqqət toplama qabiliyyəti artır, yaddaş güclənir və ümumi həyat keyfiyyəti yaxşılaşır. Bu səbəbdən “early night” trendi sadəcə sosial media dəbi deyil, eyni zamanda sağlam yaşam vərdişi kimi qiymətləndirilir.
Ekspertlər xüsusilə iş stressi yaşayan və gündəlik yorğunluqdan əziyyət çəkən şəxslərə erkən yatmaq vərdişini tövsiyə edirlər.
Mənbə: WorldNews