Efiopiyanın paytaxtı Əddis-Əbəbədə keçirilən “Yeni Dünya: Afrikanın Ortaq Gələcəyin Formalaşmasında Rolu” adlı Dünya İctimai Sammiti başa çatıb. İki gün davam edən tədbirdə 50 ölkədən 2 mindən çox nümayəndə iştirak edib.
Bugun.tv xəbər verir ki, Dünya Xalqları Assambleyası və Qlobal Qara Mərkəzinin birgə təşkilatçılığı ilə keçirilən sammit Afrika qitəsində ictimai diplomatiya sahəsində mühüm beynəlxalq platformalardan biri kimi qiymətləndirilib. Forumda hökumət nümayəndələri, beynəlxalq təşkilatlar, ali təhsil müəssisələri, biznes dairələri, gənclər təşkilatları və mədəniyyət xadimləri bir araya gəlib.
Tədbir çərçivəsində iki plenar iclas və 11 tematik sessiya keçirilib. Müzakirələrdə humanitar əməkdaşlığın genişləndirilməsi, dövlət suverenliyinin qorunması, mədəni müxtəlifliyin təşviqi, təhsil, elm, gənclərin liderlik potensialının inkişafı və davamlı inkişaf məsələləri əsas gündəm mövzuları olub.
Sammitin açılış mərasimi BMT-nin Afrika İqtisadi Komissiyasının qərargahında baş tutub. Dünya Xalqları Assambleyasının baş katibi Andrey Belyaninov çıxışında Afrikanın beynəlxalq münasibətlər sistemində artan rolunu vurğulayaraq, qitə ölkələrinin bərabərhüquqlu tərəfdaş kimi qəbul edilməsinin vacibliyini bildirib.
Forumun yekununda Əddis-Əbəbə Ticarət və Sənaye Palatası, Kotebe Təhsil Universiteti, Serve Global Inc. və Fiscal.com SARL ilə dörd əməkdaşlıq sazişi imzalanıb. Həmçinin Dünya Xalqları Assambleyasının Zambiyada yeni nümayəndəliyi fəaliyyətə başlayıb.
Sammitdə qəbul olunan qərarların 18–19 sentyabr 2026-cı il tarixlərində Moskvada keçiriləcək “Yeni Dünya: Birləşdirən Dəyərlər” adlı İkinci Dünya İctimai Assambleyasında təqdim ediləcəyi bildirilib.
Mənbə: mail.ru