Rusiyanın xarici işlər naziri Sergey Lavrov İsrail və ABŞ-ın Fələstin dövlətinin yaradılmasına mane olduğunu, Fələstin dövləti qurulmadan Yaxın Şərqdə təhlükəsizliyin olmayacağını bildirib. Rusiyanın xarici işlər naziri Sergey Lavrov Qazaxıstanın paytaxtı Astanada Şanxay Əməkdaşlıq Təşkilatına (ŞƏT) üzv ölkələrin xarici işlər nazirlərinin toplantısından sonra açıqlama verib. Rusiya naziri Lavrov İsrail-Qəzza müharibəsinə toxunan çıxışında Fələstin dövlətinin qurulmasının lazım olduğunu bildirib. Lavrov, “Biz ortaq bir fikrə gəldik ki, Fələstin dövləti qurulmadan Avrasiyanın bu bölgəsində təhlükəsizliyin təmin edilməsi mümkün deyil. Həm İsrail, həm də İsraili dəstəkləyən ABŞ bu prosesin qarşısını almağa çalışır” deyib.
Qərbin Avrasiya siyasəti ilə bağlı Lavrov deyib: “ABŞ başda olmaqla Qərb bütün Avrasiyaya nəzarəti ələ keçirməyə çalışır. NATO və Avropa İttifaqı (Aİ) nümayəndələri Asiyadakı strukturlarını inteqrasiya etməyə və Asiya ölkələrini tabe etməyə çalışırlar”.
İyunun 15-16-da İsveçrənin ev sahibliyi ilə Ukrayna ilə bağlı keçiriləcək sülh konfransını dəyərləndirən Lavrov bu konfransın Ukrayna prezidenti Vladimir Zelenskinin ultimatum sülh formulasına müraciət etmək üçün təşkil edildiyini bildirərək, “Qərb Rusiya Federasiyasına ultimatum qoymaq istəyir. Ukrayna üzrə konfransa ölkələri cəlb etmək cəhdləri absurddur” deyib.
Koreya yarımadasındakı vəziyyətə toxunan Lavrov ABŞ və müttəfiqlərinin oradakı vəziyyəti pozmağa çalışdığını bildirib.
Mənbə: TGRT