Alimlər fillərin xortumunda pişik bığına bənzəyən xüsusi tüklərin heyvanın toxunma duyusunu gücləndirdiyini və sosial ünsiyyətdə mühüm funksiyaya malik olduğunu aşkarlayıblar.
Bugun.tv xəbər verir ki, Almaniyada Max Planck Ağıllı Sistemlər İnstitutunun rəhbərliyi ilə aparılan araşdırma zamanı fillərin xortumunun xüsusilə uc hissəsində sıx yerləşən və sayı təxminən 1000-ə çatan tüklərin görünüşcə pişik və ya siçan bığına bənzəsə də, struktur baxımından fərqli olduğu müəyyən edilib.
Tədqiqat nəticələrinə görə, bu xüsusi tüklər fillərin qalın dərisinə və zəif görmə qabiliyyətinə baxmayaraq ətraf mühiti yüksək dəqiqliklə hiss etməsinə imkan yaradır. Məhz bu tüklərin köməyi ilə fillər əşyaları daha kontrollu şəkildə tuta bilir və obyektləri zərər vermədən qavraya bilirlər.
Araşdırmada bildirilib ki, tüklər toxunma zamanı titrləmə (vibrasiya) yaradır və bu titrəmələr xortumdakı sinir hüceyrələri tərəfindən qəbul edilir. Bu mexanizm sayəsində fillər qidaları əzmədən tutmaqla yanaşı, digər fillərlə ünsiyyət qurur və sosial qarşılıqlı əlaqələrini gücləndirirlər.
Alimlər fillərin bu həssas toxunma qabiliyyətindən ilhamlanaraq gələcəkdə robot texnologiyasında yeni toxunma sensorları hazırlamağı planlaşdırdıqlarını açıqlayıblar.
Araşdırmanın detalları “Science” jurnalında dərc olunub.
Mənbə: TRT Haber