Fransa Senatı hökumətin təklif etdiyi pensiya islahatını yanvarın sonundan bəri ölkə boyu etirazlar fonunda təsdiqləyib.
Bugun.tv xəbər verir ki, səsvermənin nəticələri Baş nazir Elizabet Bornun Twitter səhifəsində açıqlanıb.
“Yüzlərlə saatlıq müzakirələrdən sonra Senat pensiya islahatı mətnini qəbul etdi. Bu, pensiyalarımızın gələcəyini təmin edəcək islahat yolunda həlledici addımdır. Biz yaxın günlərdə veriləcək yekun qərara tam hazırıq “, – baş nazir bildirib.
Rəsminin sözlərinə görə, 195 senator islahatın lehinə, 112 qanunverici isə əleyhinə səs verib.
Fransa Senatı pensiya yaşının 2030-cu ilə qədər 64-ə qaldırılmasını nəzərdə tutan düzəlişi təsdiqləyib. Senatorlar həmçinin 20 yaşında işə başlayan və ən azı 43 il xidmət stajı olanlar üçün 63 yaşında erkən pensiyaya çıxmaq imkanını dəstəkləyiblər.
Qeyd edək ki, Fransada yanvarın sonundan bəri pensiya islahatına qarşı etiraz aksiyası keçirilirdi. Fransa Daxili İşlər Nazirliyinin məlumatına görə, nümayişlərdə 368 min insan iştirak edib.
Mənbə:TASS