Bugun.tv xəbər verir ki, Fransada oktyabrın 17-18-də baş verən kütləvi etirazlar və müşayiət olunan zorakılıq hadisələrinin iqtisadi zərərinin təxminən 1,1 milyard avro olacağı ehtimal edilir. Hadisələr zamanı çoxsaylı mağazalara, ictimai binalara və digər obyektlərə ziyan dəyib.
“Ensonhaber” nəşrinin məlumatına görə, Fransanın Dövlət İdarəçiliyi və Siyasətləri Araşdırma Fondu (IFRAP) tərəfindən aparılan hesablamalarda ümumi zərərin 1,1 milyard avroya çata biləcəyi bildirilir. Bu məbləğin təxminən 910 milyon avrosunun birbaşa maddi zərər, 190 milyon avrosunun isə biznes fəaliyyətinin dayanması və ya azalması nəticəsində yaranan gəlir itkisi olduğu qeyd edilir.
Sığorta şirkətlərinin zərərin təxminən 800 milyon avroluq hissəsini ödəyəcəyi, qalan 300 milyon avronun isə yerli idarəetmə orqanlarının, sahibkarların və vətəndaşların üzərinə düşə biləcəyi ehtimal olunur.
Məlumatda bildirilir ki, hadisələr zamanı 2 500-dən çox ticarət obyektinə ziyan dəyib. Oktyabrın 17-də isə 1 161 mağaza talan və yanğınlar nəticəsində ciddi zərər görüb. Limoges şəhərində bələdiyyə binasının yandırılması da qeydə alınan ciddi hadisələr arasındadır.
Qeyd edək ki, göstərilən məbləğ ilkin qiymətləndirmədir və yekun zərər hələ rəsmən müəyyənləşdirilməyib.
Mənbələr: Ensonhaber