Bugun.tv xəbər verir ki, İtaliyanın Milan şəhərində yaşayış xərclərinin artması və mənzil probleminə qarşı keçirilən etirazlardan sonra gərginlik davam edir. “The Guardian” nəşrinin oktyabrın 23-də yaydığı məlumata görə, baş verən hadisələr ölkədə gənclərin sosial imkanları, yoxsulluq və gələcəklə bağlı narahatlıqları yenidən gündəmə gətirib.
Etirazlar toqquşmalarla nəticələnib
Ötən həftəsonu Milanda keçirilən yürüş əvvəlcə dinc xarakter daşısa da, sonradan nümayişçilərlə polis arasında qarşıdurma baş verib. Polis gözyaşardıcı qazdan istifadə edib, bəzi şəxslər mağazaların şüşələrini sındırıb və əmlaka ziyan vurublar. Nəşrin məlumatına görə, iki gün ərzində 271-dən çox gənc saxlanılıb, 32 nəfər həbs edilib.
İtaliya hökuməti hadisələrdən sonra Milana 500 hərbçi göndərib və iğtişaşlarda iştirak edənlərə qarşı daha sərt cəzalar nəzərdə tutan tədbirlər tətbiq edib. Yeni qaydalara əsasən, yetkinlik yaşına çatmayanların törətdiyi bəzi vandalizm hallarında valideynlərin də maddi məsuliyyət daşıması nəzərdə tutulur.
Gənclər gələcəklərindən narahatdır
Məqalədə bildirilir ki, etirazların arxasında yalnız qiymət artımı deyil, həm də sosial bərabərsizlik, ayrı-seçkilik və imkanların məhdudluğu dayanır. Xüsusilə aztəminatlı ailələrdən olan və miqrant mənşəli gənclər cəmiyyətdə özlərini kənarda qalmış hiss etdiklərini bildirirlər.
Milan Katolik Universitetinin sosioloqu Mauro Maqatti hesab edir ki, narazılığa yalnız sərt tədbirlərlə cavab vermək etirazları daha da gücləndirə bilər. Onun fikrincə, zorakılıq pislənilməli, eyni zamanda insanların sosial problemlərinin həlli üçün dialoqa üstünlük verilməlidir.
“The Guardian” yazır ki, Milandakı hadisələr İtaliyanın digər şəhərlərində, o cümlədən Turin və Bolonyada baş verən etirazlarla yanaşı, gənclərin gələcək imkanları ilə bağlı daha geniş müzakirələrə səbəb olub.
Mənbə: The Guardian