Google süni intellekt sahəsində rəqabəti gücləndirmək məqsədilə üç yeni modelini istifadəyə təqdim edib. Yeni modellər arasında ən güclü versiya hesab olunan Gemini 3.6 Flash, kibertəhlükəsizlik üçün hazırlanmış Gemini 3.5 Flash Cyber və rəqəmsal köməkçi funksiyaları üçün nəzərdə tutulan Gemini 3.5 Flash-Lite yer alır.
Şirkətin məlumatına görə, Gemini 3.6 Flash proqramlaşdırma və maliyyə əməliyyatlarında əvvəlki versiyadan daha yüksək performans göstərir və daha aşağı xərc tələb edir. Gemini 3.5 Flash Cyber isə proqram təminatındakı təhlükəsizlik boşluqlarını aşkar edib aradan qaldırmaq üçün hazırlanıb.
Google bildirib ki, kibertəhlükəsizlik modeli açıq mənbəli V8 JavaScript Engine üzərində aparılan sınaqlarda 55 təhlükəsizlik problemini aşkarlayıb. Bunlardan 10-u indiyədək heç bir süni intellekt modeli tərəfindən müəyyən edilməmiş kritik boşluqlar olub.
Şirkət həmçinin yüksək performanslı Gemini 3.5 Pro modeli üzərində işlərin davam etdiyini açıqlayıb. Google nümayəndələrinin sözlərinə görə, yeni Flash modelləri əvvəlki versiyalarla müqayisədə təxminən 17 faiz daha az token istifadə edir ki, bu da proqram tərtibatçıları üçün xərclərin azalmasına imkan yaradır.
Mənbə: Trt.haber