Qafqaz Müsəlmanları İdarəsindən verilən məlumata əsasən, Şeyxülislam Allahşükür Paşazadə həzrətləri Səudiyyə Ərəbistanına səfəri zamanı onu müşayiət edən nümayəndə heyəti ilə Kral Fəhd adına Qurani-Kərim çapetmə kompleksini ziyarət edib.
Burada onu qarşılayan kompleksin baş katibi cənab Atif İbrahim əl-Ülyan kompleks haqqında geniş məlumat verib. Onun sözlərinə görə, burada təkçə son beş il ərzində üç yüz iyirmi milyon Qurani-Kərim nüsxəsi çap edilərək, dünyanın bir çox ölkələrinə göndərilib. Qurani-Kərim burada 76 müxtəlif dillərə tərcümə edilir.
Bildirilir ki, kompleksdə Qurani-Kərim təfsiri və beş cilddən ibarət görmə qüsuru olan insanlar üçün xüsusi Quran nüsxələri çap olunur.
Şeyxülislam həzrətləri kompleksin xatirə dəftərində yazı yazaraq Kompleksin gördüyü işlərin İslam dininə və dünya müsəlmanlarına önəmli töhfələr verdiyini qeyd edib.
Eyni zamanda, Şeyxülislam həzrətləri səfəri çərçivəsində Mədinə şəhərində yerləşən Məhəmməd Peyğəmbərin (s.a.s.) məscidini ziyarət edib, Peyğəmbər məqamında Azərbaycan dövləti, prezident İlham Əliyev cənabları və bütün Azərbaycan xalqı üçün dualar edib. Allah qəbul etsin!
