Yaponiyada yanvarın 20-dən bəri davam edən güclü qar yağışı ölkədə ciddi fəsadlara səbəb olub. Son məlumatlara görə, təbii fəlakət nəticəsində həyatını itirənlərin sayı azı 42 nəfərə, yaralananların sayı isə azı 444 nəfərə yüksəlib.
Yerli Fövqəladə Halların İdarə Edilməsi Agentliyi (FDMA) tərəfindən yayılan açıqlamada bildirilib ki, yaralılardan 156 nəfərin vəziyyəti ağır, 288 nəfərin vəziyyəti isə yüngüldür.
Məlumata görə, ən çox ölüm halı Niigata əyalətində qeydə alınıb – burada 15 nəfər həyatını itirib. Digər bölgələrdə isə ölənlərin sayı belədir: Akitada 8 nəfər, Aomori və Yamagatada 5 nəfər, Hokkaydoda 4 nəfər. Bundan əlavə, Ivate, Fukui, Nagano, Kyoto və Shimane bölgələrində də hərəsində 1 nəfərin öldüyü bildirilib.
FDMA əhaliyə qar təmizləmə işlərini təkbaşına etməməyi, mobil telefonla təmin olunmağı, hündür yerlərdə işləyərkən təhlükəsizlik kəndiri və dəbilqədən istifadə etməyi tövsiyə edib.
Qeyd olunur ki, bir sıra bölgələrdə hava, avtomobil və dəmir yolu nəqliyyatında ciddi gecikmələr və məhdudiyyətlər yaşanıb. Qar təmizləmə işlərinə dəstək məqsədilə bəzi ərazilərə Yaponiyanın Özünümüdafiə Qüvvələrinin (SDF) əməkdaşları cəlb olunub.
Mənbə: Ensonhaber