İran Xarici İşlər Nazirliyinin sözçüsü İsmail Bekayi paytaxt Tehrandakı tarixi Arg Meydanı bölgəsinə təşkil olunan hücum nəticəsində Gülistan Sarayına zərər dəyməsinə sərt reaksiya verib.
O, bu addımı “açıq müharibə cinayəti” kimi qiymətləndirib.
Məlumata görə, martın 1-də ABŞ və İsrail tərəfindən Tehrana edilən hücum zamanı UNESCO Dünya İrsi Siyahısına daxil edilmiş Gülistan Sarayının bəzi hissələrinə ziyan dəyib. Partlayışın təsiri nəticəsində sarayın şüşələri sınıb, bir sıra memarlıq elementlərinə zərər gəlib.
İsmail Bekayi sosial media hesabında bildirib ki, sözügedən raket hücumu İranın mədəni irsini və qədim sivilizasiya tarixini hədəf alır. O, 1954-cü il Haaqa Konvensiyasına, Cenevrə Konvensiyalarının 1977-ci il Əlavə Protokoluna və Beynəlxalq Cinayət Məhkəməsinin Roma Statutuna istinad edərək, mədəni obyektlərə qarşı qəsdən hücumların beynəlxalq humanitar hüququn kobud şəkildə pozulması olduğunu vurğulayıb.
Rəsmi Tehran beynəlxalq ictimaiyyəti hadisəyə hüquqi qiymət verməyə çağırıb. Hücum nəticəsində çoxsaylı tarixi əşyaların da zərər gördüyü bildirilir.
Mənbə: Ensonhaber