Bugun.tv xəbər verir ki, gün batımının yaratdığı rəng çalarlarını izləmək və gözəl fotolar çəkmək üçün dünyanın ən əlverişli səyahət məkanları müəyyənləşdirilib. “Euronews” nəşrinin oktyabrın 16-da yaydığı məlumata görə, səyahət şirkəti Kuoni meteoroloq Cim Deyl ilə əməkdaşlıq edərək 165 məkanı müxtəlif göstəricilər əsasında qiymətləndirib.
Araşdırmada buludluluq, yağış ehtimalı, işıq çirklənməsi, küləyin sürəti və gün batımının orta müddəti nəzərə alınıb. Nəticədə dünyanın ən yaxşı 20 məkanı seçilib.
İordaniya siyahıya başçılıq edir
Reytinqdə birinci yeri İordaniyanın Vadi Rum səhrası tutub. Az buludlu hava və yağıntının az olması bu ərazini gün batımını izləmək üçün əlverişli məkanlardan birinə çevirir.
İkinci yerdə Namibiyanın Sosusvley səhrası, üçüncü yerdə isə həmin ölkədə yerləşən Damaraland bölgəsi qərarlaşıb. Çilinin Atakama səhrası dördüncü, Omanın Vahiba qumluq ərazisi isə beşinci yeri tutub.
Namibiyanın ilk altılıqda üç məkanla təmsil olunması diqqət çəkir. Siyahıda Botsvananın Okavanqo deltası və Namibiyadakı Etoşa Milli Parkı da yer alıb.
Yunanıstan Avropada seçilən ölkədir
Avropa məkanları arasında Yunanıstanın Rodos adasındakı Lindos Akropolu ilk onluğa daxil olub. Dəniz səviyyəsindən 116 metr yüksəklikdə yerləşən tarixi ərazi gün batımını geniş mənzərə ilə izləmək imkanı verir.
Siyahıda Kiprin Pafos şəhər mərkəzi 16-cı, Rodos şəhəri 17-ci, Afinadakı Sunion burnu 19-cu, Zakinf adasındakı Naqia gəmi qəzası sahili isə 20-ci yerdə göstərilib.
Mütəxəssislər bildirirlər ki, gün batımının gözəlliyinə təkcə məkanın mənzərəsi deyil, həm də hava şəraiti, buludların miqdarı və süni işıqlandırmanın səviyyəsi təsir edir.
Mənbə: Euronews