Gürcüstanda baş nazir İrakli Kobaxidzenin 2028-ci ilin sonuna qədər Avropa İttifaqı (Aİ) ilə danışıqlara başlamağı gündəmə gətirməməsindən sonra başlayan nümayişlər 11-ci gündə də davam edir.
Gürcüstanın Batumi şəhərində davam edən nümayişlərlə yanaşı, minlərlə insan gecə saatlarında paytaxt Tbilisidə parlament binası qarşısına toplaşaraq hökumətin qərarına etiraz edib.
Bəzi nümayişçilər parlament binasına daş atıblar.
Gürcüstan daxili işlər nazirinin müavini Aleksandre Daraxvelidze noyabrın 28-dən bəzi şəxslərin parlament binasına və polisə qarşı zorakılıq hərəkətləri etdiyini, insidentlərdə 150 polis əməkdaşının yaralandığını bildirib.
Davam edən etirazlarda bəzi jurnalistlərin yaralandığını, şəhərin infrastrukturunun zədələndiyini bildirən Daraxvelidze 400-dən çox adamın saxlandığını qeyd edib.
Avropa Parlamenti oktyabrın 26-da Gürcüstanda keçirilən parlament seçkilərinin yenilənməsini tələb edib və müxalifət və Aİ tərəfdarları küçələrə çıxaraq nümayişlər təşkil etməyə başlayıblar.
Baş nazir Kobaxidze noyabrın 28-də verdiyi açıqlamada bəzi avropalı siyasətçilərin Gürcüstanın daxili işlərinə qarışdığını və onları Aİ-nin pulları ilə şantaj etdiyini bildirib və deyib: “Bütün bunları nəzərə alaraq, Aİ ilə danışıqlara başlamamaq qərarına gəldik”.
Mənbə : İlkha