Bugun.tv xəbər verir ki, oktyabrın 21-dən 22-nə keçən gecə Orionid meteor yağışı maksimum həddə çatacaq. Əlverişli hava şəraitində müşahidəçilər bir saat ərzində 10–20 meteor görə bilərlər.
“The Guardian” nəşrinin yaydığı məlumata görə, hər il oktyabr ayında müşahidə olunan Orionid meteor yağışı Yer kürəsinin Halley kometinin geridə qoyduğu toz və xırda hissəciklər arasından keçməsi nəticəsində yaranır.
Bu hissəciklər Yer atmosferinə saniyədə təxminən 66 kilometr sürətlə daxil olur. Atmosferdə qızan hissəciklər gecə səmasında işıqlı izlər yaradır. Məhz bu hadisə meteor yağışı kimi tanınır.
Meteor yağışını necə izləmək olar?
Bu il müşahidələrə Ayın parlaq işığı mane ola bilər. Ay zəif meteorların görünməsini çətinləşdirəcək. Bununla belə, Ay üfüqün altına endikdən sonra, xüsusilə sübhə yaxın saatlarda müşahidə üçün daha əlverişli şərait yarana bilər.
Meteor yağışını izləmək üçün şəhər işıqlarından uzaq, səmanın geniş hissəsinin göründüyü təhlükəsiz məkan seçmək məsləhətdir. Xüsusi teleskop və ya durbin tələb olunmur. Gözlərin qaranlığa uyğunlaşması üçün bir qədər vaxt vermək lazımdır.
Onu da qeyd edək ki, Orionid meteor yağışı hər il müşahidə edilən astronomik hadisələrdəndir. Bu hadisə həm peşəkar astronomların, həm də gecə səmasını izləməyi sevən insanların marağına səbəb olur.
Mənbə: The Guardian