Əfqanıstan İslam Əmirliyinin qərbə açılan qapısı Herat Gömrük Qapısında çərşənbə günü baş verən yanğında içərisindəki ticarət malları da daxil olmaqla 40 yük maşını tamamilə yanaraq kül olub.
Çərşənbə günü Herat Gömrüyündə naməlum səbəbdən baş verən yanğında gömrük anbarının və gömrük qapısında gözləyən 40 yük maşınının yandığı açıqlanıb.
İrandan əlavə olaraq gələn yanğınsöndürənlərin müdaxilə etdiyi yanğında külli miqdarda maddi ziyan dəyib.
Herat Sağlamlıq Müdirliyi səlahiyyətliləri gömrük idarəsində baş verən yanğın zamanı yanğınsöndürmə briqadasının yalnız 8 əməkdaşının tüstüdən təsirləndiyini bildirərək, başqa xəsarət alan və ölən olmadığını açıqlayıb.
Milyonlarla dollarlıq ziyanın baş verdiyi yanğın bölgəsində aparılan ilkin araşdırmada yanğının səbəbinin hələlik məlum olmadığı və araşdırmanın davam etdiyi bildirilib.
Herat Gömrük Müdiri Məhəmməd Həmid Əhməd, “Hadisənin səbəbi hələ məlum deyil, polis komandanlığı və kəşfiyyat təşkilatından ibarət müştərək komitə hadisəni araşdırmağa başlayıb” deyib.
Təbii Fəlakətlərlə Mübarizə İdarəsinin rəisi Nurəddin Turabi, “Təəssüf ki, itki çox idi və biz bura araşdırma aparmaq üçün gəldik” deyib.
Herat Gömrük Müdirliyində keçirilən yığıncaqda çıxış edən dükan sahibləri və yerli idarəçilər tələblərini səlahiyyətlilərə çatdırıblar.
Yanğının Herat Gömrük Müdirliyi məsullarının səhlənkarlığı nəticəsində baş verdiyini bildirən Ticarət və İnvestisiya Palatasının müdir müavini Məhəmməd Yunus Momand, “Hökumətə təklifimiz bu hadisə ilə bağlı xüsusi komissiyanın təyin edilməsidir” deyib.
Ölkə gömrüyündə kifayət qədər imkan olmadığını və bu idarələrin anbarlarında milyonlarla dollarlıq ticarət malının olduğunu bildirən bəzi ticarətçilər, “Ticarətçilərə mallarını qoruyub saxlamağa imkan verən standart bir sistem hələ ki yoxdur. Yanğınsöndürmə üçün də kifayət qədər imkan yoxdur”. O, rayonda yaşadıqları problemləri izah edib.
Mənbə: İLKHA