İngiltərə hökuməti ekstremal hava şəraiti və mümkün kiberhücumlara hazırlıq məqsədilə əhaliyə evlərdə konservləşdirilmiş qida və içməli su ehtiyatı saxlamağı tövsiyə etməyə hazırlaşır.
Financial Times-ın məlumatına görə, hökumət sosial şəbəkələr üzərindən xüsusi maarifləndirmə kampaniyası keçirməyi planlaşdırır. Kampaniyada insanlara güclü istilər, digər ekstremal hava hadisələri və ölkəyə qarşı mümkün kiberhücumlar zamanı necə davranmalı olduqları barədə praktiki tövsiyələr veriləcək.
Hökumətin bu istiqamətdə fəaliyyətini sürətləndirməsinə Rusiyadan gələn təhlükələr, həmçinin bu yay İngiltərədə müşahidə olunan isti hava dalğaları təsir göstərib.
Məlumata görə, hökumət ölkənin xarici təhdidlərə qarşı müdafiəsini əhatə edən xüsusi “müharibə kitabçası” üzərində də işi sürətləndirir. Bundan başqa, ölkənin milli risk siyahısı yenilənərək demokratik proseslərə müdaxilə ehtimalı da siyahıya daxil edilib.
Rəsmilər bildirirlər ki, əhaliyə veriləcək tövsiyələr panika yaratmaq məqsədi daşımır. Evdə müəyyən miqdarda su və konservləşdirilmiş qida saxlamaq kimi sadə tədbirlərin böhran vəziyyətlərində cəmiyyətin dayanıqlığını artıracağı düşünülür.
Mütəxəssislər isə uzunmüddətli istilər və quraqlığın İngiltərədə kənd təsərrüfatına və ərzaq təhlükəsizliyinə əlavə təzyiq yarada biləcəyi barədə xəbərdarlıq edirlər.
Mənbə: TRT Haber