Harvard Medical School-ın mütəxəssisləri bildiriblər ki, normal çəkidə olan insanlarda da qarın bölgəsinin böyüməsinin bir neçə səbəbi ola bilər və bu, həmişə qida ilə bağlı deyil.
Araşdırmaya görə, əsas amillərdən biri xroniki stressdir.
Uzun müddət stress altında olan orqanizm kortizol hormonu istehsal edir ki, bu da qarın nahiyəsində piy yığılmasına təsir edə bilər. Mütəxəssislər bildirirlər ki, yüksək kortizol səviyyəsi iştahanı artırır və qarın bölgəsində piy toplanmasını sürətləndirir.
Həkimlər həmçinin yuxu çatışmazlığını bu vəziyyətin səbəblərindən biri kimi göstərirlər. Gündəlik 6 saatdan az yatmaq hormon balansını pozur və aclıq və toxluq hissini tənzimləyən mexanizmlərə təsir edir.
Bundan əlavə, oturaq həyat tərzi və yaşla bağlı dəyişikliklər də qarın böyüməsinə təsir göstərir. Yaş artdıqca orqanizmdə daxili orqanların ətrafında yığılmış visseral piy miqdarı artır və bu, 2-ci tip şəkərli diabet və digər metabolik pozuntular riskini yüksəldir.
Ekspertlər vurğulayırlar ki, hətta normal çəkidə olsaq da, bel ölçüsünə, fiziki fəaliyyət səviyyəsinə və yuxu rejiminə diqqət yetirmək vacibdir.
Mənbə: mail.ru