Bugun.Tv xəbər verir ki, Rusiyada hazırlanan “Angipur” adlı yeni preparat klinik sınaqların üçüncü – son mərhələsindən keçir. Dərmanın miokard infarktı zamanı və ürəyin koronar damarlarına müdaxilələr aparılarkən istifadə edilməsi nəzərdə tutulur.
Volqoqrad Dövlət Tibb Universitetinin Əczaçılıq fakültəsinin dekanı, əczaçılıq elmləri doktoru Viktor Sirotenkonun sözlərinə görə, preparat trombositlərin bir-birinə yapışmasının və qan laxtalarının yaranmasının qarşısını alan antiagreqantlar qrupuna daxildir.
Dərmanın bazara çıxması nə vaxt gözlənilir?
Sirotenko bildirib ki, hazırda bir neçə tibb mərkəzində çoxsaylı pasiyentin iştirakı ilə preparatın təsirliliyi və təhlükəsizliyi qiymətləndirilir. Onun proqnozuna görə, sınaqlar uğurla başa çatarsa, “Angipur” yaxın bir-iki il ərzində bazara çıxarıla bilər.
Məlumata görə, preparatın hazırlanması üzərində işlər təxminən 10 il davam edib. Onun əsas molekulu Başqırdıstan Dövlət Tibb Universitetinin kimyaçıları tərəfindən sintez olunub, ilkin sınaqlar isə Volqoqrad alimləri tərəfindən aparılıb.
Qeyd edək ki, “Angipur” hələ klinik sınaq mərhələsindədir və istifadəyə təsdiqlənmiş dərman kimi təqdim edilə bilməz. Onun tətbiqi ilə bağlı yekun qərar sınaqların nəticələrindən və müvafiq təsdiqlərdən asılı olacaq.
Mənbə: mail.ru