İngiltərədə may ayından etibarən müşahidə olunan isti hava dalğaları ölkə iqtisadiyyatına ciddi zərər vurub. İstehsal itkiləri nəticəsində iqtisadiyyata dəyən zərərin üç ay ərzində 4,4 milyard funt sterlinqə çatdığı hesablanıb.
İngiltərədə isti hava dalğalarının yaratdığı iqtisadi itkilər getdikcə artır. Avqustun 10-da ölkə ərazisinin 71 faizi üçün rəsmi olaraq quraqlıq elan edilib. Eyni zamanda, İngiltərənin bütün bölgələrində su ehtiyatlarının ciddi təzyiq altında olduğu barədə xəbərdarlıq edilib.
Ölkədə isti hava dalğaları may ayında başlayıb. İyulun sonuna qədər isə ümumilikdə dörd isti hava dalğası qeydə alınıb.
İsti hava 3 ayda 4,4 milyard funt sterlinq itki yaradıb
Düşüncə mərkəzi Verdant tərəfindən aparılan təhlilə əsasən, isti hava dalğalarının İngiltərə iqtisadiyyatına vurduğu zərər may ayında 510 milyon, iyunda 2,36 milyard, iyulda isə 1,5 milyard funt sterlinq təşkil edib.
Beləliklə, istehsal itkiləri nəticəsində iqtisadiyyatda yaranan ümumi zərərin üç ay ərzində 4,4 milyard funt sterlinqə çatdığı hesablanıb.
İsti hava dalğalarının səbəb olduğu istehsal itkiləri əsasən İngiltərənin cənub-şərqində, Londonda və digər bəzi bölgələrdə müşahidə olunub.
İqtisadi itkilər 2030-cu ilə qədər 25,6 milyard funt sterlinqə çata bilər
Təhlildə bildirilir ki, həddindən artıq isti hava şəraitinə qarşı lazımi tədbirlər görülməsə və isti hava dalğalarının intensivliyi daha da artsa, bu hadisələrin yaratdığı iqtisadi itkilər 2030-cu ilə qədər 25,6 milyard funt sterlinqə çata bilər.
İngiltərədə bu həftə ilin beşinci isti hava dalğası yaşanır. Proqnozlara görə, sabah ölkənin bəzi ərazilərində havanın temperaturu 36-37 dərəcəni keçə bilər.
Mənbə: EnSonHaber