İran Xarici İşlər nazirinin müavini Kazım Qəribabadi ölkəsinə qarşı törədildiyini iddia etdiyi müharibə cinayətləri ilə bağlı hüquqi proseslərin sonadək davam etdiriləcəyini bəyan edib.
Fars Xəbər Agentliyinin məlumatına görə, Qəribabadi “Fədakar Hüquqşünaslar” mövzusunda keçirilən simpoziumda çıxışı zamanı bildirib ki, İrana qarşı törədilmiş müharibə cinayətləri ilə bağlı daxili və beynəlxalq hüquq platformalarında mübarizə aparılacaq.
Onun sözlərinə görə, ABŞ əleyhinə beynəlxalq məhkəmə və təşkilatlara təqdim olunmaq üçün artıq 1 400 səhifədən çox hüquqi hesabat və sənəd hazırlanıb. Qəribabadi qeyd edib ki, məhkəmə prosesləri 10–15 il davam etsə belə, hüquqi mübarizə dayandırılmayacaq.
Nazir müavini vurğulayıb ki, əvvəlcə İran məhkəmələrində qərarların qəbul edilməsi xarici məhkəmələrdə qaldırılacaq iddialar üçün mühüm hüquqi əsas yaradacaq və müraciətlərin prosessual səbəblərlə rədd edilməsinin qarşısını alacaq.
Qəribabadi həmçinin müharibə cinayətləri ilə bağlı sübutların toplanmasının sürətləndirilməsinin vacibliyini qeyd edərək, vaxtın uzanmasının hüquqi baxımdan risk yarada biləcəyini bildirib.
Xatırladaq ki, İsrail 2025-ci il iyunun 13-də İranın nüvə obyektləri və hərbi infrastrukturlarına genişmiqyaslı zərbələr endirmiş, daha sonra ABŞ da İranın Natanz, Fordo və İsfahandakı nüvə obyektlərinə hücum etmişdi. 2026-cı ilin iyununda isə ABŞ və İran arasında başlayan hərbi qarşıdurma təxminən 40 gün davam etmiş, tərəflər iyulun 27-də döyüş əməliyyatlarını dayandırmaq barədə razılığa gəlmişdilər.
Mənbə: Fars Xəbər Agentliyi