Bugun.Tv xəbər verir ki, İranın xarici işlər naziri Abbas Əraqçi Səudiyyə Ərəbistanı ilə danışıqların davam etdiyini bildirib. Tehran regionda xarici müdaxilə olmadan yeni təhlükəsizlik razılaşmalarının yaradılmasını hədəflədiyini açıqlayıb.
“Reuters”in məlumatına görə, Əraqçi bu barədə sosial şəbəkədə yazıb. Ötən həftə Səudiyyə Ərəbistanı, Türkiyə və Pakistanın yüksək vəzifəli nümayəndələri Tehranda İran rəsmiləri ilə görüşüblər. Bu, avqust ayından bəri həmin ölkələrin İranla ilk yüksək səviyyəli təması olub.
Riyad görüşlərin məqsədinin regionda hərbi gərginliyin yenidən artmasının qarşısını almaq üçün danışıqlar kanallarını açmaq olduğunu bildirib.
Bununla yanaşı, Yəməndə husilərlə Səudiyyə Ərəbistanı arasında qarşıdurmanın gücləndiyi qeyd olunur. Husilərin Bab əl-Məndəb boğazı istiqamətində fəallaşması və Səudiyyə Ərəbistanının bəzi obyektlərinə hücumları regional təhlükəsizlik narahatlıqlarını artırıb.
İran və Səudiyyə Ərəbistanı arasında dialoqun davam etməsi Yaxın Şərqdə gərginliyin azaldılması cəhdləri baxımından diqqət çəkir.
Mənbə: Reuters