Rusiya Federal Təhlükəsizlik Xidməti (FSB) Telegram platformasının qurucusu və baş icraçı direktoru Pavel Durov barəsində “terror fəaliyyətinə yardım” ittihamı ilə beynəlxalq axtarış elan olunduğunu açıqlayıb.
FSB-nin yaydığı məlumata görə, Telegram rəhbərliyi Rusiyada terror və təxribat aktlarının əlaqələndirilməsi üçün istifadə olunduğu iddia edilən kanal və botları silməyib. Qurum bununla bağlı Pavel Durov haqqında cinayət araşdırmasının aparıldığını və beynəlxalq axtarış qərarının verildiyini bildirib.
Açıqlamada qeyd olunur ki, Ukrayna xüsusi xidmət orqanları, eləcə də terror və ekstremist təşkilatlar Telegram-da fəaliyyət göstərən çoxsaylı kanal, söhbət qrupları və botlardan Rusiyada terror aktları, təxribatlar, kütləvi hücumlar və kiberdələduzluq fəaliyyətlərinin hazırlanması və koordinasiyası üçün istifadə ediblər.
Xatırladaq ki, Rusiya bir müddət əvvəl Telegram-a qarşı müxtəlif məhdudiyyətlər tətbiq edib və şirkəti ümumi məbləği 100 milyon rubldan çox olan cərimələrlə cəzalandırıb.
Kremlin sözçüsü Dmitri Peskov da iyulun 27-də bildirib ki, Telegram-ın Rusiyada tam fəaliyyətini bərpa etməsi ilə bağlı danışıqlar davam edir. Onun sözlərinə görə, şirkət nümayəndələri bu prosesdə kifayət qədər fəallıq göstərmirlər.
Qeyd edək ki, Telegram Rusiyada ən çox istifadə olunan mesajlaşma və sosial şəbəkə platformalarından biri hesab olunur.
Mənbə: TRT Haber