Bugun.tv xəbər verir ki, son zamanlar dövlət müəssisələrinin əksəriyyətindən işdənçıxarılma halları ilə bağlı şikayətlər var. Şikayət olunan belə qurumlardan biri də “Azərbaycan Dəmir Yolları” Qapalı Səhmdar Cəmiyyətinin “Fövqəladə Hallar Qatarı” MMC-nin Gəncə bölməsidir.
Belə ki, səslərinin, şikayətlərinin eşidilmədiyini görən işdən ixtisara salınan Rəşad Quliyev, Rəşad Məhərrəmov, Həmid Heydərov, Tural Aslanov, Mübariz Kazımov, Xaliz Aslanov və başqaları toplaşaraq sosial şəbəkə hesablarından əlaqədar qurumlara müraciət ediblər. Haqsız yerə çıxarılmaları barədə qərar qəbul olunduğunu söyləyən Arif Abbasov və digərləri videomüsahibədə qurumun 30-a yaxın əməkdaşını işdən azad etmək istədiklərini bildiriblər.
“28 nəfəri işdən azad etmək istəyirlər. Hərəsinin 2-3 uşağı var. Səbəb olmadan fəhlələri işdən çıxararaq işçilərin övladlarını ac qoyurlar. Halbuki, biz vətən üçün canımızdan keçməyə hazır olan şəxslərik. 44 günlük müharibəyə də könüllü yazılmışdıq. Əsgərlərimizə müharibə zamanı geyim, qida köməkliyimizi əsirgəməmişik. İşlədiyimiz müddətdə uğurlarımız çox olub. İndi tələb edirlər ki, bildirişə qol çəkib öz xoşumuzla işdən uzaqlaşaq. Səbəb isə idarənin bağlanmasını bildirirlər”.
Sözügedən şikayətlə bağlı “Azərbaycan Dəmir Yolları” Qapalı Səhmdar Cəmiyyətinin mətbuat xidməti ilə əlaqə yaratdıq. Bildirdilər ki, şikayət edən işçilərin çıxarılmasında heç bir qanuna zidd əməl yoxdur. Onlarla bağlanan əmək müqaviləsinin vaxtı bitib və işdən azad olunublar.
Mövzuya yenidən qayıdacağıq.
Müxbir: İntizar Əmirova