İsrail ordusu işğal altındakı İordan çayının qərb sahilinin Kalkiliya şəhərində fəaliyyət göstərən “Hüda Qurani-Kərim” radiosunun ofisinə reyd keçirərək yayımı dayandırıb.
Yerli mənbələrin məlumatına görə, İsrail hərbçiləri buldozerlərin müşayiəti ilə şəhərə daxil olub və radionun ofisində axtarış aparıblar. Reyd zamanı radioya məxsus yayım avadanlıqları və digər texniki vasitələr müsadirə edilib, radiostansiyanın fəaliyyəti isə dayandırılıb.
İsrail ordusu radionun binasının girişinə vurduğu bildirişdə qurumun “terror fəaliyyətində iştirak etdiyi və ona dəstək verdiyi üçün qanunsuz elan edildiyini” iddia edib.
Hələlik radiostansiyanın nə qədər müddətə bağlanacağı və müsadirə edilən avadanlıqların taleyi ilə bağlı rəsmi açıqlama verilməyib.
Hadisə İsrailin İordan çayının qərb sahilində həyata keçirdiyi əməliyyatlar fonunda baş verib. Fələstin tərəfi və yerli təşkilatlar isə bu cür addımların media azadlığına və dini məzmunlu yayım fəaliyyətinə mənfi təsir göstərdiyini bildirirlər.
Mənbə: TRT Haber