İtaliyanın idman naziri Andrea Abodi ölkəsinin 2026-cı il Dünya Kubokuna sonradan daxil edilməsi ilə bağlı təklifi qəti şəkildə rədd edib. Nazir bu ideyanın həm mümkün olmadığını, həm də uyğun sayılmadığını bildirib.
Nazir qeyd edib ki, futbolun ən böyük turniri olan FIFA Dünya Kuboku kimi yarışlarda iştirak yalnız meydandakı nəticələrlə qazanılmalıdır və sonradan siyasi və ya inzibati qərarlarla dəyişdirilə bilməz.
Təklif ABŞ-ın keçmiş prezidenti Donald Trumpın xüsusi elçisi Paolo Zampolli tərəfindən irəli sürülmüşdü. O, İranın mümkün kənarlaşdırılması halında dördqat dünya çempionu olan İtaliyanın turnuvaya daxil edilməsinin doğru olacağını iddia etmişdi.
Lakin Abodi bu yanaşmanı qəbul etməyərək bildirib: “Bu, ilk növbədə mümkün deyil, ikinci olaraq isə uyğun deyil. Seçmə mərhələlər meydanda qazanılır.”
Digər tərəfdən, İranın turnuvada iştirak edib-etməyəcəyi hələ də müzakirə mövzusudur. FIFA prezidenti Gianni Infantino daha əvvəl İranın yarışda iştirak edəcəyini açıqlasa da, müxtəlif ssenarilər gündəmdə qalır.
Ekspertlər hesab edir ki, İran turnuvadan çıxarılsa belə, onun yerini İtaliya yox, Asiya zonasında ən yüksək reytinqə malik komandalar, o cümlədən Birləşmiş Ərəb Əmirlikləri tuta bilər.
Qeyd edək ki, İtaliya son illərdə futbol böhranı yaşayır və ardıcıl üçüncü dəfə Dünya Kubokuna qatıla bilməyib. Bu fonda Gabriele Gravina və milli komandanın baş məşqçisi Gennaro Gattuso da istefa veriblər.
Mənbə: TrtHaber