İtaliyanın Kampaniya regionundakı Vezuvi vulkanının ətəklərində meşə yanğını baş verib.
Bugun.tv xəbər verir ki, iki istiqamətdə yayılan yanğının söndürülməsi üçün 8 təyyarə və yüzdən çox yerüstü heyət cəlb edilib. Yanğın yaşayış məntəqələrindən bir neçə kilometr aralıdadır.
Neapol prefekturasında fövqəladə vəziyyətin əlaqələndirilməsi və həlli üçün daimi işçi qrupu yaradılıb. Vezuvi Milli Parkının məlumatında vəziyyətin ciddi olaraq qaldığı və təbii irsin qorunmasının vacibliyi bildirilib.
Yüksək temperatur və güclü külək alovun geniş əraziyə yayılmasına səbəb olur, hazırda yanğın 1050 metr yüksəkliyə çatıb.
Mülki Müdafiə Departamentinin məlumatına görə, iyunun 15-dən indiyədək Kampaniyada 1060 yanğın hadisəsi qeydə alınıb, 2568 hektar ərazi yanıb.
Mənbə: AZƏRTAC