Bugun.tv xəbər verir ki, ABŞ-ın əczaçılıq və tibbi texnologiyalar şirkəti “Johnson & Johnson” 2026-cı ilin üçüncü rübü üzrə maliyyə nəticələrini açıqlayıb. Şirkətin gəliri və düzəliş edilmiş mənfəəti analitiklərin gözləntilərini üstələyib.
“Reuters” agentliyinin oktyabrın 13-də yaydığı məlumata görə, şirkətin üçüncü rüb üzrə gəliri 25,4 milyard dollar təşkil edib. Bu göstərici analitiklərin 25,28 milyard dollarlıq proqnozundan yüksəkdir. Səhm başına düzəliş edilmiş mənfəət isə 2,59 dollar olub ki, bu da gözləntiləri 5 sent üstələyib.
Dərman satışlarında artım qeydə alınıb
Şirkətin immun sistemi ilə əlaqəli xəstəliklərin müalicəsində istifadə olunan “Tremfya” preparatının satışları ötən ilin müvafiq dövrü ilə müqayisədə 68 faiz artaraq 2,4 milyard dollara çatıb. Bu nəticə analitiklərin 2,2 milyard dollarlıq gözləntisini də üstələyib.
Şirkətin ümumi əczaçılıq məhsulları satışları 7,7 faiz artaraq 16,76 milyard dollar təşkil edib. Bununla belə, tibbi texnologiyalar bölməsinin nəticələri gözləntilərdən aşağı olub. Bu bölmənin satışları 2,5 faiz artaraq 8,6 milyard dollara yüksəlsə də, analitiklərin 8,71 milyard dollarlıq proqnozuna çatmayıb.
Şirkətin maliyyə direktoru Co Uolk bildirib ki, Yaxın Şərqdəki münaqişə, Avropada qənaət tədbirləri və Çində qiymət təzyiqləri beynəlxalq bazarlardakı nəticələrə təsir göstərir. Onun sözlərinə görə, Yaxın Şərqdə müdafiə xərclərinin artması bəzi ölkələrdə səhiyyəyə ayrılan vəsaitlərə də təsir edir.
Ortopedik məhsullar bölməsinin ayrılması planlaşdırılır
“Johnson & Johnson” şirkəti ortopedik məhsullar üzrə fəaliyyət göstərən “DePuy Synthes” bölməsini ayrıca şirkətə çevirmək planını davam etdirir. Şirkətin maliyyə direktoru ayrılmanın 2027-ci ilin ortalarında həyata keçirilməsinin nəzərdə tutulduğunu bildirib.
Bundan əlavə, şirkət 2026-cı il üzrə gəlir proqnozunu da artırıb. Yeni hesablamaya əsasən, illik gəlirin təxminən 101,2 milyard dollar olması gözlənilir. Səhm başına düzəliş edilmiş mənfəət proqnozunun orta göstəricisi isə 11,10 dollara yüksəldilib.
Mənbə: Reuters