Bugun.tv xəbər verir ki, Cənubi Afrikadan olan pastor Coşua Mlakelanın 2026-cı il oktyabrın 12–13-də möminlərin göyə yüksələcəyi ilə bağlı iddiası sosial şəbəkələrdə geniş müzakirələrə səbəb olub.
“Mail.ru” nəşrinin məlumatına görə, pastor bu tarixləri ona Tanrı və İsa Məsih tərəfindən bildirildiyini iddia edib. O, söhbətin Yer kürəsinin məhv olmasından deyil, xristian inanclarında “göyə yüksəlmə” kimi tanınan hadisədən getdiyini bildirib. Bu inanca görə, möminlərin böyük fəlakətlərdən əvvəl göyə yüksələcəyi düşünülür.
Pastor əvvəlki proqnozunu da dəyişib
Coşua Mlakela daha əvvəl bu hadisənin 2025-ci il sentyabrın 23-də baş verəcəyini iddia etmişdi. Həmin proqnoz gerçəkləşmədikdən sonra pastor Tanrının insanlara tövbə etmək üçün əlavə vaxt verdiyini bildirib.
O, yeni tarixləri təqvimlə bağlı yanlış hesablamalarla izah edib və hadisənin oktyabr ayında baş verəcəyini irəli sürüb.
İddiaların elmi əsası yoxdur
Nəşr qeyd edir ki, sosial şəbəkələrdə pastorun açıqlamaları bəzən “dünyanın sonu” kimi təqdim olunur. Halbuki onun öz açıqlamasında söhbət Yer kürəsinin məhvindən deyil, dini inanc çərçivəsində təsvir edilən hadisədən gedir.
Belə proqnozların gerçəkləşəcəyini təsdiqləyən elmi sübut yoxdur. NASA-nın Yerə yaxın asteroid və kometləri izləyən mütəxəssislərinin məlumatlarına əsasən, hazırda planet üçün təhlükə yaradan məlum kosmik obyekt müəyyən edilməyib.
Mütəxəssislər və rəsmi qurumların məlumatları ilə təsdiqlənməyən bu cür iddialara ehtiyatla yanaşmaq, əsassız qorxu və təşviş yaradan paylaşımları fakt kimi qəbul etməmək vacibdir.
Mənbə: mail.ru