Bugun.tv xəbər verir ki, Kaliforniya sahilləri Sakit okeanda hərəkət edən nəhəng “Kelvin dalğası”nın təsirinə hazırlaşır. Alimlərin məlumatına görə, isti su kütləsinin oktyabrın əvvəlində San-Fransisko körfəzi ərazisinə çatacağı gözlənilir.
The Guardian-ın məlumatına görə, “Kelvin dalğası” adi okean dalğası kimi sahilə çırpılmır. Bu hadisə okeanın dərinliklərində hərəkət edən böyük isti su kütləsinin dəniz səviyyəsini aşağıdan yüksəltməsi ilə baş verir. Alimlərin hesablamalarına əsasən, Kaliforniya sahillərində suyun səviyyəsi təxminən 30 santimetr arta bilər.
Mütəxəssislər bildirirlər ki, bu yüksəliş güclü qabarma və fırtına dalğaları ilə üst-üstə düşərsə, sahil ərazilərində daşqın riski əhəmiyyətli dərəcədə arta bilər.
Kaliforniyada artıq sahilboyu ərazilərin və vacib infrastrukturun qorunması üçün hazırlıq işlərinə başlanılıb. Marin dairəsində qum torbaları paylanır, drenaj sistemləri təmizlənir və daşqından qoruyucu tədbirlər görülür.
Alimlər qarşıdakı qış aylarında fırtınalar, yüksək qabarma və “El Niño” şəraitinin bir-birinə uyğun gəlməsinin vəziyyəti daha da çətinləşdirə biləcəyini bildirirlər.
Mənbə: The Guardian