Kişi var ki, buza bənzər, qadının nəfəsindən əriyər.
Kişi var ki, koronovirusa bənzər, iki aydan bir gələr, gedər.
Kişi var ki, həyatı fortopianonun dillərinə bənzər, bir günü ağdır, bir günü qara.
Kişi var ki, futbol topuna bənzər, gah o qapıdadır, gah bu qapıda.
Kişi var ki, arvadını boynunda gəzdirər, kişi var ki, arvadının boynunda gəzər.
Kişi var ki, bir ayağı burda, bir ayağı gorda, amma gözü orda-burda.
Kişi var ki, kişilərin naxşıdır, kişi var ki, kərgədan ondan yaxşıdır.
Kişi var ki, dindirirsən can deyir, kişi var ki, canı yalandan deyir.
Kişi var ki, köhnə maşına bənzər, motoru yağ yeyir, xodovoyu işləmir, amma fanarları yanır-sönür.
Kişi var ki, hər dərdə dərmandır, kişi var ki, adını çəkmə amandır.
Kişi var ki, yer altından nöyüt çıxardar, kişi var ki, qaşınmayan yerdən qan çıxardar.
Kişi var ki, cəbhədə düşmən vurar, kişi var ki, kişilikdən dəm vurar.
Kişi var ki, namusa görə qana-qandır, kişi var ki, namusdan kənardır.
Kişi var ki, şəhid olub bayrağına bürünər, kişi var ki, var-dövlətilə öyünər.
Əhməd Orucoğlu