Bugun.tv xəbər verir ki, Ukraynanın paytaxtı Kiyevdə ərzaq təchizatı ilə bağlı problemlər artıb. Rusiya hücumlarının ərzaq anbarlarına və logistika mərkəzlərinə zərər vurması şəhərdə bəzi məhsulların çatışmazlığına səbəb olub.
“The Guardian”ın məlumatına görə, bir sıra supermarketlərdə rəflərin boşaldığı və təchizat xətlərinin pozulduğu bildirilir. Ölkənin kənd təsərrüfatı siyasəti naziri Taras Vısotski ərzaq qiymətlərinin təxminən 2,5 faiz arta biləcəyini bildirib.
Lakin bəzi sahibkarlar bahalaşmanın daha yüksək ola biləcəyini düşünür. Logistika marşrutlarının yenidən qurulması, anbarların dəyişdirilməsi və zədələnmiş obyektlərin bərpası şirkətlərin xərclərini artırır.
Məlumata görə, Novus, ATB, Silpo və Fora kimi iri ticarət şəbəkələrinin logistika sistemi də zərbələrdən təsirlənib. Bəzi şirkətlər milyonlarla avro dəyərində məhsulu itirdiklərini bildirirlər.
Son hücumlar yalnız ərzaq anbarlarına deyil, tibbi məhsulların saxlandığı obyektlərə və humanitar yardım anbarlarına da təsir göstərib.
Mütəxəssislər belə hücumların yalnız hərbi deyil, həm də iqtisadi və sosial nəticələr yaratdığını bildirirlər. Ərzaq təchizatında yaranan problemlərin uzun müddət davam etməsi qiymət artımını daha da sürətləndirə bilər.
Mənbə: The Guardian