Bugun.tv xəbər verir ki, Körfəz ölkələri ABŞ-la İran arasında hərbi qarşıdurmanın yenidən başlamasının qarşısını almaq məqsədilə çoxşaxəli diplomatik razılaşma üzərində işləyirlər. Plan Hörmüz boğazının açılmasını, İrana qarşı sanksiyaların yumşaldılmasını və Yəməndə husilərin qüvvələrinin geri çəkilməsini nəzərdə tutur.
“The Guardian” qəzetinin diplomatik redaktoru Patrik Vinturun 28 oktyabr tarixli yazısına görə, İran iqtisadi sanksiyalar aradan qaldırıldıqdan sonra Hörmüz boğazını dörd gün ərzində açmağa hazır olduğunu bildirib. Tehran daha əvvəl bunun üçün yeddi günlük müddət təklif etmişdi.
Lakin ABŞ razılaşma üçün əlavə güzəştlər tələb edir. Avropa diplomatları hesab edirlər ki, İranın BMT-nin nüvə obyektləri üzrə müfəttişlərinin ölkəyə qayıtmasına icazə verməsi danışıqlarda mühüm şərt ola bilər. Tehran isə hələlik nüvə proqramı ilə bağlı müzakirələri ümumi prinsiplərlə məhdudlaşdırır.
Səudiyyə Ərəbistanı, Türkiyə və Pakistanın nümayəndə heyəti də Yəməndəki münaqişənin həlli və regionda uzunmüddətli təhlükəsizlik sisteminin yaradılması məsələlərini müzakirə etmək üçün Tehrana səfər edib.
Omanın xarici işlər naziri Bədr əl-Busaidi region ölkələrinin ortaq təhlükəsizlik razılaşmasının iqtisadi əməkdaşlıq üçün yeni imkanlar aça biləcəyini bildirib. Bununla belə, təklif olunan planın hələ razılaşdırılmadığı və tərəflər arasında ciddi fikir ayrılıqlarının qaldığı bildirilir.
Mənbə: The Guardian