Bugun.tv xəbər verir ki, kosmosa uzunmüddətli səfərlər insan beynində gözləniləndən daha ciddi dəyişikliklər yaradır. BBC-nin yaydığı məlumata görə, alimlər mikroqravitasiya şəraitinin beynin fəaliyyətinə təsirini araşdıraraq müəyyən ediblər ki, çəkisizlik zamanı beyin özünü yeni mühitə uyğunlaşdırmaq üçün yenidən formalaşdırır.
Araşdırma Böyük Britaniyanın Birkbeck Universitetinin alimləri tərəfindən aparılıb və nəticələri Frontiers in Psychology jurnalında dərc olunub. Tədqiqat çərçivəsində 15 fərqli beyin görüntüləmə araşdırmasının nəticələri təhlil edilib. Ümumilikdə 377 nəfərin, o cümlədən astronavtların və Yer üzərində kosmik uçuş şəraitini simulyasiya edən könüllülərin məlumatları araşdırılıb.
Mütəxəssislər müəyyən ediblər ki, mikroqravitasiya beynin hərəkət, tarazlıq və bədən mövqeyini idarə edən hissələrində həm struktur, həm də funksional dəyişikliklər yaradır. Alimlərin fikrincə, insan beyni Yerin cazibə qüvvəsini daim qəbul edib emal etməyə uyğun inkişaf etdiyindən, bu qüvvənin olmaması sinir sisteminin fəaliyyətini yenidən təşkil etməsinə səbəb olur.
Araşdırmanın müəllifləri bildirirlər ki, bu dəyişikliklər astronavtların kosmosda yaşamasına kömək etsə də, Ay və Mars kimi uzunmüddətli missiyalar zamanı yeni problemlər yarada bilər. Xüsusilə uzun müddət çəkisizlikdə qaldıqdan sonra fərqli cazibə qüvvəsinə malik mühitə eniş zamanı tarazlıq və hərəkət koordinasiyasında ciddi çətinliklər yaşana bilər.
Avropa Kosmik Agentliyinin həkimi Alessandro Alçibiade qeyd edib ki, sağlam beyin olmadan ən müasir kosmik texnologiyalar belə missiyanın uğurunu təmin edə bilməz. Onun sözlərinə görə, gələcəkdə astronavtların beynini yeni cazibə şəraitinə daha tez uyğunlaşdırmaq üçün xüsusi üsullar hazırlanmalıdır.
Alimlər hesab edirlər ki, kosmosda aparılan bu tədqiqatlar yalnız gələcək kosmik missiyalar üçün deyil, həm də insan beyninin işləmə mexanizmini daha dərindən anlamaq baxımından böyük əhəmiyyət daşıyır.
Mənbə: BBC