Kremlin Sarayının sözçüsü Dmitriy Peskov Rusiya ilə İran arasında keçirilən birgə dəniz təlimləri ilə bağlı açıqlama verib.
Bugun.tv xəbər verir ki, Peskov təlimlərin Yaxın Şərqdə ABŞ mənbəli artan gərginliklə əlaqəli olub-olmaması sualına cavab olaraq bildirib ki, bu hərbi təlimlər öncədən planlaşdırılıb və əvvəlcədən razılaşdırılmış tədbirlər çərçivəsində həyata keçirilir.
Peskovun sözlərinə görə, Rusiya İranla münasibətləri daha da inkişaf etdirməyə davam edir və bölgədəki artan gərginlik fonunda bütün tərəfləri, xüsusilə də Tehranı ehtiyatlı davranmağa çağırır.
Kremlin sözçüsü vurğulayıb ki, Rusiya həm İranı, həm də regiondakı digər tərəfləri problemlərin həllində siyasi və diplomatik yolları prioritet hesab etməyə çağırır.
Peskov eyni zamanda İsveçrənin Cenevrə şəhərində keçirilən ABŞ-Rusiya-Ukrayna üçtərəfli görüşləri barədə də danışaraq qeyd edib ki, danışıqlar hazırda ictimaiyyətə açıqlanacaq mərhələdə deyil.
O, həmçinin Rusiya Prezidenti Vladimir Putin ilə ABŞ Prezidenti Donald Tramp arasında yaxın zamanda görüş planının olmadığını da bildirib.
Mənbə: Ensonhaber