Siyasi ekspert Məhəmməd Əsədullazadə İsraildə parlament seçkilərindən sonra hökumətin formalaşdırılması ilə bağlı vəziyyəti şərh edib.
Bugun.tv xəbər verir ki, Milli Cəbhə Partiyasının sədr müavini Məhəmməd Əsədullazadə öz sosial media hesabında dərc etdiyi paylaşımda İsraildə siyasi qüvvələr arasında mübarizənin və koalisiya danışıqlarının hökumətin gələcəyini müəyyənləşdirəcəyini bildirib.
Ekspertin şərhinə görə, 120 yerlik Knessetdə heç bir siyasi qüvvənin hökuməti təkbaşına formalaşdırmaq üçün tələb olunan 61 mandatı əldə edə bilməməsi koalisiya danışıqlarını zəruri edir. O qeyd edib ki, Benyamin Netanyahunun rəhbərlik etdiyi Likud partiyası ilə müxalifət qüvvələri arasında fikir ayrılıqları yeni hökumətin qurulmasını çətinləşdirə bilər.
Məhəmməd Əsədullazadə ərəb partiyalarının parlamentdəki mövqeyinin də hökumətin formalaşdırılması prosesinə təsir göstərə biləcəyini vurğulayıb. Bununla yanaşı, müxalifət daxilində və digər siyasi qüvvələrlə mümkün əməkdaşlıq məsələsində razılığın əldə olunması əsas şərtlərdən biri kimi qiymətləndirilir.
Ekspertin fikrincə, tərəflər arasında razılaşma əldə edilməzsə, növbədənkənar parlament seçkiləri ehtimalı gündəmə gələ bilər. O, Netanyahunun siyasi gələcəyinin partiyalar arasındakı danışıqlardan və mümkün koalisiya razılaşmalarından asılı olacağını qeyd edib.