Bugun.tv-yə şikayət daxil olub. Vətəndaş Zərifə Novruzova 3 ilə yaxındır ki, pensiyasını bütöv şəkildə ala bilmədiyini deyir. Onun sözlərinə görə, təqaüdü əvvəlcə 250 manat kəsilib. Bu ilin yanvar ayında təyin olunan artım isə 50 manat əskik hesablanıb.
O, 2020-ci ildə pensiyasının düzgün hesablanmadığı iddiası ilə məhkəməyə müraciət edib. Cavabdeh qismində isə Sosial Müdafiə Fondu olub. “Son 3 il müddətində 3 məhkəmə prosesindən keçdim. Rayon, inzibati və Apeliyasiya məhkəməsinin çıxardığı qərarlar da haqlı olduğumu göstərdi. Mən kəsilən pensiyamın bərpasını istəyirəm. Ötən illər düzgün hesablanmalı və pulum geri qaytarılmalıdır”.
Şikayətçi deyir ki, çıxarılan qərarlara baxmayaraq onun kəsilən təqaüdü hələ verilməyib.
Bugun.tv olaraq Sosial Müdafiə Fondu ilə əlaqə saxladıq. Mətbuat xidmətinin rəhbəri Rəşad Mehdili Zərifə Novruzovanın yaşa görə əmək pensiyasının bərpası ilə bağlı müraciətini cavablandırıb. Onun sözlərinə görə, Dövlət Sosial Müdafiə Fondu 17 mart 2023-cü il tarixində şikayətçinin xeyrinə çıxarılan apeliyasiya qərarından kassasiya şikayəti verib. “Məhkəmə prosesi davam edir. Nəticəyə əsasən, müvafiq qərar veriləcək”,- qurum rəsmisi bildirib.
Mövzuya yenidən qayıdacağıq.
Müxbir: Qaytən Qasımzadə