Bugun.tv xəbər verir ki, Milli Cəbhə Partiyasının başqan müavini, siyasi ekspert Məhəmməd Əsədullazadə Rusiyada keçirilən Dövlət Duması seçkilərindən sonra Moskvanın Ukraynaya qarşı hərbi təzyiqi artıracağını və yeni hərbi kampaniyaya başlaya biləcəyini bildirib.
Ekspert sosial media hesabında paylaşdığı təhlildə Rusiyada hakim partiyanın seçkilərdə qalib gəlmək imkanlarının yüksək olduğunu qeyd edib. Onun sözlərinə görə, seçki prosesi ciddi siyasi alternativlərin məhdud olduğu şəraitdə keçirilir və hakimiyyətin əsas rəqiblərindən biri olan “Yabloko” partiyası da seçkilərdən kənarlaşdırılıb.
Əsədullazadə hesab edir ki, Rusiya-Ukrayna müharibəsinin davam etməsi, ölkəyə qarşı tətbiq olunan iqtisadi sanksiyalar və sosial-iqtisadi problemlərin yaratdığı narazılıqlar Kreml qarşısında müəyyən çətinliklər yaradır. Buna baxmayaraq, onun fikrincə, Rusiya Prezidenti Vladimir Putin hərbi əməliyyatları davam etdirəcək.
Ekspert xüsusilə seçkilərdən sonra Rusiyada yeni hərbi səfərbərlik keçirilməsi ehtimalına diqqət çəkib. O bildirib ki, Moskva bununla Ukraynaya qarşı hərbi təzyiqi artırmaqla yanaşı, NATO ölkələrinə, xüsusilə Polşaya qarşı siyasi və hərbi təzyiq imkanlarını da genişləndirməyə çalışa bilər.
Əsədullazadənin proqnozuna görə, qarşıdakı qış aylarında Rusiyanın Donbas istiqamətində hərbi əməliyyatları intensivləşdirmək və bölgədə nəzarəti genişləndirmək cəhdləri mümkündür.
Ekspert qeyd edib ki, Moskva Donbasla bağlı strateji məqsədlərinə nail olmayacağı təqdirdə hərbi əməliyyatları dayandırmağa hazır olub-olmayacağı əsas suallardan biri olaraq qalır. Onun fikrincə, bu baxımdan Rusiya-Ukrayna müharibəsində yaxın dövrdə daha sərt hərbi və siyasi mərhələnin başlanması mümkündür.