Bugun.tv xəbər verir ki, Fransa Prezidenti Emmanuel Makron qlobal ticarətdə yaranmış balanssızlıqların aradan qaldırılması məqsədilə G7 ölkələri və Çin nümayəndələrinin iştirakı ilə videokonfrans keçirəcək.
Reuters agentliyinin yaydığı məlumata görə, videokonfrans iyunun 11-də təşkil olunacaq və müzakirələrdə Beynəlxalq Valyuta Fondu (BVF) ilə digər beynəlxalq tərəfdaşlar da iştirak edəcəklər.
Fransa Prezident Administrasiyasının açıqlamasında bildirilir ki, təşəbbüs Çin, ABŞ və Avropa arasında iqtisadi sahədə daha sıx koordinasiyaya marağın artdığını nümayiş etdirir. Görüşdə qlobal ticarət balanssızlığı, iqtisadi əməkdaşlıq və beynəlxalq bazarlardakı çağırışların müzakirə olunacağı gözlənilir.
Analitiklərin fikrincə, son illərdə dünya iqtisadiyyatında müşahidə olunan qeyri-sabitlik, ticarət mübahisələri və geosiyasi gərginliklər aparıcı iqtisadi güclər arasında dialoqun əhəmiyyətini daha da artırıb.
Mütəxəssislər hesab edirlər ki, belə bir formatda keçiriləcək görüş qlobal iqtisadi əməkdaşlığın gücləndirilməsi istiqamətində mühüm addım ola bilər.
Mənbə: Reuters