Bugun.Tv xəbər verir ki, Londonda keçirilən marafon zamanı ürəyi dayanan 43 yaşlı Qaret Hopkins hadisədən altı ay sonra yarışın sonuncu milini piyada keçərək yarımçıq qalan məsafəni tamamlayıb.
“BBC”nin məlumatına görə, təcili tibbi yardım əməkdaşı olan Hopkins aprelin 26-da keçirilən London marafonunda finişə təxminən bir mil qalmış qəfil ürək dayanması keçirib. O, xəstəxanaya çatdırılıb və uzun müddət müalicə alıb.
Həkimlər hadisənin həddindən artıq isinmə nəticəsində yaranan ağır rabdomiolizlə – əzələ toxumasının parçalanması ilə əlaqəli olduğunu bildiriblər.
Noyabrın 4-də Hopkins ailə üzvləri, dostları və onu dəstəkləyən insanların müşayiəti ilə marafonun qalan sonuncu milini piyada keçib. Bununla o, aprel ayında yarımçıq qalan marşrutu tamamlayıb.
Hopkins başına gələn hadisədən sonra sağ qalmasının və yenidən yeriyə bilməsinin onun üçün böyük sevinc olduğunu bildirib. Bu addım onun uzun bərpa prosesinin simvolik yekunu olub.
Mənbə: BBC