Bugun.tv xəbər verir ki, Hindistanın Haryana ştatının Hisar şəhərində yaşayan memar Qokul Qoyal isti havalarda kondisionerdən daha az istifadə etmək üçün qeyri-adi üsul hazırlayıb. O, evinin damında təxminən 7 min ədəd gil fincandan istifadə edərək təbii istilik izolyasiyası yaradıb. Bu üsul nəticəsində evin daxili temperaturunun 4-5 dərəcə aşağı düşdüyü bildirilir.
Qoyal Hindistanda çay içmək üçün geniş istifadə olunan “kulhad” adlanan gil fincanları tərs şəkildə damın üzərində sıralayıb. Daha sonra onların üzərini sement və mozaika örtüyü ilə bağlayaraq əlavə izolyasiya qatı yaradıb.
Sistemin əsas prinsipi fincanların arasında və daxilində yaranan hava boşluqlarıdır. Hava istiliyin beton damdan evin daxilinə keçməsini zəiflədir. Üst hissədəki açıq rəngli mozaika isə günəş şüalarının bir hissəsini geri əks etdirərək damın həddindən artıq qızmasının qarşısını almağa kömək edir.
Qoyalın məlumatına görə, bu üsul elektrik enerjisi tələb etmədən evin daha sərin qalmasına imkan verir. Nəticədə kondisioner və ventilyatorlardan istifadənin azalması ilə elektrik xərclərində 20-25 faizə qədər qənaət əldə etmək mümkündür.
Maraqlı layihə ənənəvi materialların müasir memarlıqda enerjiyə qənaət məqsədilə necə istifadə oluna biləcəyini göstərir.
Mənbə: Business Today