Bugun.tv xəbər verir ki, bu gün Mingəçevir şəhər Heydər Əliyev Mərkəzində “15 İyun – Milli Qurtuluş Günü” münasibətilə Mingəçevir Şəhər İcra Hakimiyyəti, YAP Mingəçevir şəhər Təşkilatı və Mingəçevir Dövlət Universitetinin birgə təşkilatçılığı ilə “Ulu Öndər Heydər Əliyev milli qurtuluşumuzun müəllifidir” mövzusunda konfrans keçirilib.
Ulu Öndərin xatirəsi yad edilib
Tədbir iştirakçıları əvvəlcə Ulu Öndər Heydər Əliyevin abidəsini ziyarət edərək önünə gül dəstələri düzüblər. Daha sonra Heydər Əliyev Mərkəzinin foyesində təşkil olunmuş sərgiyə baxış keçirilib.
Azərbaycanın ərazi bütövlüyü və müstəqilliyi uğrunda şəhid olanların, eləcə də Ulu Öndər Heydər Əliyevin xatirəsi bir dəqiqəlik sükutla yad olunub. Dövlət Himni səsləndirilib və “Ulu Öndər Heydər Əliyev milli qurtuluşumuzun müəllifidir” adlı film nümayiş etdirilib.
İlham İsmayılov Milli Qurtuluş Gününün əhəmiyyətindən danışıb
Konfransda çıxış edən Mingəçevir Şəhər İcra Hakimiyyətinin başçısı İlham İsmayılov bildirib ki, 15 İyun Azərbaycan xalqının və dövlətçiliyinin taleyində mühüm dönüş nöqtəsidir.
Onun sözlərinə görə, ötən əsrin 90-cı illərinin əvvəllərində ölkədə hökm sürən siyasi böhran, xaos və anarxiya Azərbaycanın müstəqilliyini təhlükə altına salmışdı. Belə bir dövrdə xalqın təkidli tələbi ilə Ulu Öndər Heydər Əliyev iyunun 9-da Bakıya qayıdıb, iyunun 15-də isə Ali Sovetin sədri seçilərək ölkənin xilası missiyasını üzərinə götürüb.
İcra başçısı vurğulayıb ki, Heydər Əliyevin həyata keçirdiyi siyasət nəticəsində ölkədə sabitlik təmin olunub, dövlət quruculuğu prosesi başlanıb və Azərbaycanın gələcək inkişafının əsası qoyulub.
Azərbaycanın uğurları diqqətə çatdırılıb
İlham İsmayılov qeyd edib ki, Prezident İlham Əliyevin rəhbərliyi ilə Azərbaycan mühüm uğurlara imza atıb.
Bildirilib ki, 2020-ci ildə 44 günlük Vətən müharibəsində torpaqlarımız işğaldan azad edilib. 2023-cü ilin sentyabrında keçirilən antiterror tədbirləri nəticəsində isə ölkənin suverenliyi tam bərpa olunub.
Hazırda Qarabağ və Şərqi Zəngəzurda genişmiqyaslı bərpa-quruculuq işləri həyata keçirilir. Böyük Qayıdış proqramı çərçivəsində keçmiş məcburi köçkünlərin doğma yurdlarına qayıdışı davam edir.
Digər çıxışlar dinlənilib
Konfransda YAP Mingəçevir şəhər Təşkilatının sədri Bəxtiyar Mustafayev, Mingəçevir Dövlət Universitetinin rektoru Anar Eminov, Qərbi Azərbaycan İcmasının Mingəçevir şəhər nümayəndəliyinin sədri Mayıl İsmayılov və Mingəçevir Şəhər Ruhi Əsəb Xəstəlikləri Dispanserinin baş həkimi Şəmsinur Hüseynova çıxış ediblər.
Natiqlər Milli Qurtuluş Gününün Azərbaycan dövlətçiliyinin möhkəmlənməsindəki rolundan, Ulu Öndər Heydər Əliyevin xidmətlərindən və bu siyasi kursun Prezident İlham Əliyev tərəfindən uğurla davam etdirilməsindən bəhs ediblər.
Tədbir bədii kompozisiya ilə yekunlaşıb
Sonda Milli Qurtuluş Gününə həsr olunmuş bədii kompozisiya təqdim olunub.
Mənbə: Demokrat.Az