Dünyada həyata keçirilən və hazırda tikintisi davam edən nəhəng layihələr mühəndislik möcüzələri ilə diqqət çəkir. Yaşayış sahəsini yaxşılaşdırmaqla yanaşı, bölgənin işçi qüvvəsini də artırır. Bəs bu nəhəng strukturlar harada yerləşir? Dünyanın ən təsirli və qabaqcıl 17 meqa layihəsini təqdim edirik…
Hinkley Point C (İngiltərə)
Böyük Britaniyada 25 milyard funt-sterlinq dəyərində olan atom elektrik stansiyasının 6 milyon evi elektrik enerjisi ilə təmin edəcəyi gözlənilir. 3260 meqavat gücündə iki reaktor qurğusunun tikintisi pandemiya ilə əlaqədar təxirə salınıb.
Cənub-Şimal Su Transferi (Çin)
62 milyard dollarlıq bu nəhəng layihə Çinin şimalına su daşıyaraq quraqlığın qarşısını almağı hədəfləyir. O, Çinin dörd əsas çayını birləşdirməyi hədəfləyir. 50 il davam edəcək layihə ilə ildə 44,8 milyard kubmetr suyun ötürülməsi planlaşdırılır.
Günəş enerjisi ilə işləyən Böyük Divar (Çin)
Daxili Monqolustanda başlanan bu layihənin uzunluğu 400 kilometr, eni isə 5 kilometrdir. Günəş panelləri ilə örtülmüş bu nəhəng enerji divarı Pekini elektrik enerjisi ilə təmin etmək, səhralaşma ilə mübarizə aparmaq və Sarı çay hövzəsini qorumaq məqsədi daşıyır. Onun enerji istehsal gücünə 2030-cu ilə qədər çatacağı gözlənilir.
NEOM (Səudiyyə Ərəbistanı)
1,5 trilyon dollar dəyərində olan bu futuristik meqapolis layihəsi tamamlandıqda dünyanın texnoloji cəhətdən ən inkişaf etmiş şəhərlərindən biri olacaq. Layihənin tamamlanmasının 2045-ci ilə qədər davam edəcəyi təxmin edilir. Hazırda bu layihədə dünya poladın 20%-i istifadə olunur.
Dangote neft emalı zavodu (Nigeriya)
Afrikanın ən böyük neft emalı zavodu olan bu obyekt 19 milyard dollara başa gəlib. O, gündə 650 min barel xam neft emal etmək gücünə malikdir.
Yeni Nil Deltası (Misir)
Misirin səhralaşmaya qarşı hazırladığı bu layihə 9,7 milyard dollarlıq büdcə ilə həyata keçirilir. 9200 kvadrat kilometr səhra ərazisi süni çay vasitəsilə suvarılan kənd təsərrüfatı sahəsinə çevriləcək. Bu yolla artan əhalinin ərzaq ehtiyaclarına töhfə vermək planlaşdırılır.
Tuas Mega Port (Sinqapur)
Büdcəsi 20 milyard dollar olan Tuas Port, süni intellektlə dəstəklənən kranlar və avtonom nəqliyyat vasitələri ilə təchiz edilmiş tam avtomatlaşdırılmış konteyner terminalıdır. Bu, tamamlandığında, illik 65 milyon konteyner tutumu ilə dünyanın ən böyük konteyner limanı olacaq. Onun 2040-cı ildə başa çatdırılması planlaşdırılır.
Əl Maktum Hava Limanı (Dubay)
33 milyard dollarlıq investisiya büdcəsi ilə inşa edilən hava limanı 260 milyon sərnişin tutumu ilə dünya aviasiyasında zirvədə olacaq. 56 kvadrat mil əraziyə yayılan layihə 5 uçuş-enmə zolağına, 6 terminala və 100 Airbus A380-ni qəbul edə bilən infrastruktura malikdir. Tamamlanması 2027-ci ildə gözlənilir.
Melaka Gateway – Malayziya
Malaziyanın 10,5 milyard dollarlıq layihəsi olan Melaka Gateway, 1366 akr əraziyə yayılmış dörd süni adadan ibarətdir. Cənub-Şərqi Asiyanın ən böyük kruiz limanı, dəniz mərkəzi, əyləncə parkları və ticarət zonaları bu adalarda yerləşəcək. 145 min nəfərin işlə təmin olunması nəzərdə tutulur
Dholera Günəş Elektrik Stansiyası – Hindistan
Qucarat ştatında yerləşən Dholera elektrik stansiyası 11 kvadrat kilometr ərazidə qurulub və 700 MVt gücündədir. Layihə Hindistanın bərpa olunan enerji hədəflərinə böyük töhfə verən dünyanın ən böyük günəş elektrik stansiyalarından biridir.
Mənbə: Ahaber