Bugun.tv xəbər verir ki, iqtisadçı və siyasi ekspert Məhəmməd Əsədullazadə Rusiyanın kütləvi informasiya vasitələrində Azərbaycana qarşı səsləndirilən fikirləri tənqid edib. O, bu barədə sosial media hesabında paylaşım edib.
Məhəmməd Əsədullazadə bildirib ki, Rusiya mediasında Azərbaycana qarşı hibrid təhdidlərin artması, Azərbaycan xalqının təhqir edilməsi, ölkə rəhbərliyi haqqında xoşagəlməz ifadələrin səsləndirilməsi və Azərbaycanın suverenliyinə yönələn təhdidlər ciddi narahatlıq doğurur.
Onun sözlərinə görə, bu məsələyə ayrı-ayrı media nümayəndələrinin şəxsi mövqeyi kimi yanaşmaq düzgün deyil. Ekspert Rusiya mediasının dövlət nəzarətində olduğunu qeyd edərək, bu cür fikirlərin müəyyən siyasi dairələrlə razılaşdırıldığını iddia edib.
Əsədullazadə hesab edir ki, Kreml son dövrlərdə qonşu ölkələrə münasibətdə daha aqressiv ritorikadan istifadə edir və Azərbaycana qarşı hibrid təzyiq siyasətinin əsas istiqamətlərindən biri də KİV-lərdən istifadədir.
O bildirib ki, Azərbaycanın müstəqil xarici siyasət yürütməsi, heç bir dövlətin maraqlarına təhdid yaratmaması və müstəqil “orta güc” kimi mövqeyini möhkəmləndirməsi Rusiyada narahatlıq doğurur.
“Azərbaycanın regional rolu artır”
Məhəmməd Əsədullazadə Prezident İlham Əliyevin Naxçıvanda verdiyi mesajların Kremlin müəyyən dairələrində “soyuq duş” effekti yaratdığını bildirib.
Ekspert Moskvanın Azərbaycana qarşı aqressiv ritorikasının səbəblərindən birinin də Azərbaycanın regional və beynəlxalq nəqliyyat layihələrində rolunun artması olduğunu düşünür.
Onun sözlərinə görə, Azərbaycan Şərq-Qərb nəqliyyat marşrutlarının əsas mərkəzlərindən birinə çevrilir, Ermənistanla sülh gündəliyini irəli aparır və Zəngəzur dəhlizi layihəsinin reallaşdırılması istiqamətində mühüm addımlar atır.
Əsədullazadə qeyd edib ki, bütün bunlar regionda yeni geosiyasi və geoiqtisadi reallıqlar formalaşdırır.
“Məhz bu səbəbdən Rusiyanın müəyyən dairələrində Azərbaycanın artan regional roluna qarşı narahatlıq və qısqanclıq müşahidə olunur”, – deyə ekspert bildirib.
“Media kampaniyası Azərbaycanın siyasətinin qarşısını ala bilməyəcək”
Məhəmməd Əsədullazadənin fikrincə, Azərbaycana qarşı media üzərindən aparılan kampaniya da bu prosesin tərkib hissəsidir.
O hesab edir ki, Rusiyanın kütləvi informasiya vasitələri vasitəsilə Azərbaycana təzyiq göstərməsi perspektivdə nəticə verməyəcək.
Ekspert Rusiyanın Azərbaycanla münasibətlərini qarşılıqlı etimad, hörmət və bərabərhüquqlu əməkdaşlıq prinsipləri əsasında inkişaf etdirməli olduğunu vurğulayıb.
Onun sözlərinə görə, qonşu dövlətə qarşı təzyiq və aqressiv ritorika Rusiyanın öz maraqlarına da ziddir.
2022-ci il Bəyannaməsinə diqqət çəkib
Əsədullazadə Azərbaycan və Rusiya arasında 2022-ci ildə imzalanmış Müttəfiqlik Qarşılıqlı Fəaliyyət haqqında Bəyannamənin prinsiplərinə də diqqət çəkib.
O bildirib ki, tərəflər imzaladıqları sənədlərə sadiq qalmalı və bir-birinin suverenliyinə hörmət etməlidirlər.
“Rusiya rəhbərliyi öz imzalarına hörmət etmir”, – deyə Əsədullazadə qeyd edib.
Ekspertin fikrincə, tərəflərin imzaladığı sənədlərə sadiq qalması və qarşılıqlı suverenliyə hörmət etməsi Azərbaycan-Rusiya münasibətlərinin gələcəyi baxımından əsas şərtlərdən biridir.
Məhəmməd Əsədullazadə bildirib ki, Azərbaycan bundan sonra da milli maraqlarına əsaslanan müstəqil siyasətini davam etdirəcək və heç bir media kampaniyası bu siyasətin qarşısını ala bilməyəcək.