Bugun.tv xəbər verir ki, Fransada orta məktəb şagirdlərinin etirazları genişlənərək ölkə üzrə yüzlərlə məktəbi əhatə edib. “The Guardian”ın məlumatına görə, etirazlar dərs cədvəllərinin həddindən artıq yüklənməsi, siniflərdə şagird sayının çoxluğu, müəllim çatışmazlığı, məktəb infrastrukturunun vəziyyəti və istilərin yaratdığı problemlərlə bağlıdır.
Ölkə üzrə təxminən 900 nümayiş, məktəb blokadası və digər insident qeydə alınıb. Cümə günü 400 məktəbin fəaliyyətini dayandırdığı bildirilib. Bundan əvvəl isə 160-dan çox məktəbin və 30 universitet şəhərciyinin bağlandığı açıqlanmışdı.
Etirazların bəzi yerlərdə qarşıdurmalara çevrilməsi nəticəsində polis qüvvələri də ərazilərə cəlb olunub. Məlumata görə, son günlərdə təxminən 3 min şagird saxlanılıb. Onlardan təxminən 2 min nəfərin bir gün ərzində saxlanıldığı bildirilir.
Etirazçılar arasında məktəb rəhbərləri və müəllimlərin də xəsarət aldığı qeyd olunur. Bəzi məktəblərdə binalara ziyan vurulub, yanğın törətməyə cəhdlər baş verib.
Fransa hökuməti vəziyyətin nəzarətdə saxlanılması üçün təhlükəsizlik tədbirlərini gücləndirib. Bəzi regionlarda təhlükəsizlik səbəbindən dərslərin onlayn keçirilməsinə başlanılıb.
Hökumət nümayişlərin qarşısının alınması üçün valideynlərin də məsuliyyət daşımalı olduğunu bildirir. Etirazların gələcək günlərdə necə davam edəcəyi isə hələlik məlum deyil.
Mənbə: The Guardian